சென்னை தனியார் மருத்துவமனையில் சத்யராஜ் அனுமதி: என்ன ஆச்சு?
- IndiaGlitz, [Saturday,January 08 2022]
பிரபல நடிகர் சத்யராஜ் சென்னையில் உள்ள தனியார் மருத்துவமனையில் அனுமதிக்கப்பட்டுள்ளதாக வெளிவந்திருக்கும் செய்தி திரையுலகில் பெரும் பரபரப்பை ஏற்படுத்தி உள்ளது.
சென்னை உள்பட தமிழகம் முழுவதும் கடந்த சில நாட்களாக கொரோனா, ஒமிக்ரான் வைரஸ்கள் மிக வேகமாக பரவி வருகிறது என்பதும் நேற்று சென்னையில் மட்டும் 4500 பேர்களுக்கும் தமிழகத்தில் கிட்டத்தட்ட 9000 பேர்களுக்கும் கொரோனா வைரஸ் பரவி உள்ளது என்பது குறிப்பிடத்தக்கது.
இந்த நிலையில் கடந்த சில நாட்களாக திரை உலக பிரபலங்களுக்கும் கொரோனா வைரஸ் பாதிப்பு ஏற்பட்டு வருகிறது. பிரபல நடிகர் மகேஷ்பாபு, நடிகை திரிஷா, இசையமைப்பாளர் தமன் உள்பட ஒருசிலர் கொரோனா வைரசால் பாதிக்கப்பட்டு சிகிச்சை பெற்று வருகின்றனர்.
அந்த வகையில் தற்போது நடிகர் சத்யராஜ் அவர்களுக்கும் கொரோனா வைரஸ் பாதிப்பு ஏற்பட்டுள்ளதை அடுத்து சென்னை அமைந்தகரையில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வருவதாக தகவல்கள் வெளியாகியுள்ளன.
சத்யராஜுக்கு மருத்துவர்கள் தீவிர சிகிச்சை அளித்து வருவதாகவும் அவரது உடல்நிலை சீராக இருப்பதாகவும் மருத்துவமனை வட்டாரங்கள் தெரிவித்துள்ளன. இந்தநிலையில் சத்யராஜ் விரைவில் குணமாகி வீடு திரும்ப வேண்டும் என ரசிகர்கள் வாழ்த்து தெரிவித்து வருகின்றனர் என்பது குறிப்பிடத்தக்கது.