சூர்யா நடிப்பில் சுதா கொங்கரா இயக்கத்தில் உருவாகியுள்ள ‘சூரரைப்போற்று’ திரைப்படத்தின் படப்பிடிப்பு முடிவடைந்து போஸ்ட் புரொடக்ஷன் பணிகள் நிறைவடையும் நிலையில் உள்ளது. இந்த நிலையில் கொரோனா வைரஸ் காரணமாக ஊரடங்கு பிறப்பிக்கப்பட்டுள்ளதால் ஊரடங்கு முடிவடைந்ததும் இந்த படத்தின் அடுத்தக் கட்ட பணிகள் தொடங்கப்படும் என்றும், இந்த படம் வரும் தீபாவளிக்கு வெளியாக வாய்ப்பு இருப்பதாகவும் கூறப்படுகிறது.

இந்த நிலையில் ’சூரரைப்போற்று’ திரைப்படம் தமிழைப்போலவே தெலுங்கிலும் வெளியாக உள்ளது என்பதும் தெலுங்கில் ’ஆகாஷம் நீ ஹாடு ரா’ என்ற டைட்டிலில் உருவாகி உள்ளது என்பதும் தெரிந்ததே. இந்த நிலையில் சூர்யாவின் படங்கள் தெலுங்கில் உருவாகும்போது அவற்றில் சூர்யாவே பின்னணி குரல் கொடுப்பார் என்பது வழக்கமான ஒன்று. ஆனால் சூரரைப்போற்று தெலுங்கு பதிப்பில் சூர்யாவுக்கு இளம் நடிகர் ஒருவர் குரல் கொடுத்து இருப்பதாக செய்திகள் வெளியாகியுள்ளது.

தெலுங்கு திரையுலகின் முன்னணி இளம் நடிகர்களில் ஒருவரான சத்யதேவ் தான் சூர்யாவுக்கு பின்னணி குரல் கொடுத்துள்ளதாகவும், இதனையடுத்து இந்த படத்திற்கு தெலுங்கு ரசிகர்களிடையே பெரும் எதிர்பார்ப்பு ஏற்பட்டுள்ளதாகவும் கூறப்படுகிறது.

சுதாகொங்கரா இயக்கத்தில் ஜிவி பிரகாஷ் இசையில் உருவாகியுள்ள இந்த படத்தில் சூர்யா, அபர்ணா பாலமுரளி, கருணாஸ், ஜாக்கி ஷெராப், மோகன்பாபு, பரேஷ் ராவல் உள்பட பலர் நடித்துள்ளனர். இந்த படம், நிகேஷ் பொம்மிரெட்டி ஒளிப்பதிவில் சதீஷ் சூர்யா படத்தொகுப்பில் உருவாகியுள்ளது. இந்த படத்தை சக்தி பிலிம் பேக்டரி நிறுவனம் மற்றும் 2டி எண்டர்டெயின்மெண்ட் நிறுவனம் இணைந்து தயாரித்துள்ளது.