கடந்த 1986ஆம் ஆண்டு ’நிலவே மலரே’ என்ற திரைப்படத்தில் நடிகராக அறிமுகமானவர் நடிகர் ரஹ்மான். இந்த படத்தின் வெற்றியை அடுத்து இயக்குனர் சிகரம் கே பாலச்சந்தரின் ’புதுப்புது அர்த்தங்கள்’ உள்பட பல திரைப்படங்களில் நடித்து கடந்த 90களிலும் 2000ஆம் ஆண்டுகளிலும் பிசியான நடிகராக ரஹ்மான் வலம் வந்தார்.

இந்த நிலையில் கடந்த சில வருடங்களாக குணச்சித்திரம் மற்றும் வில்லன் கேரக்டர்களில் நடித்து வரும் ரஹ்மான் தற்போது மீண்டும் கதாநாயகன் உள்பட ஒரு சில திரைப்படங்கள் முக்கிய வேடங்களில் நடித்து வருகிறார்.

மணிரத்னம் இயக்கி வரும் பிரமாண்டமான திரைப்படமான ’பொன்னியின் செல்வன்’ திரைப்படத்தில் முக்கிய வேடத்தில் நடித்து வரும் ரஹ்மான், இயக்குனர் மோகன் ராஜாவின் உதவியாளர் சுப்புராமன் என்பவர் இயக்கும் ஒரு படத்தில் கதாநாயகனாக நடித்து வருகிறார். இந்த படத்தின் டைட்டில் மற்றும் பர்ஸ்ட் லுக் விரைவில் வெளியாக உள்ளது என்பது குறிப்பிடத்தக்கது. மேலும் அர்ஜுன், ஜெயம் ரவி ஆகியோர் நடித்து வரும் ’ஜனகனமன’ என்ற படத்திலும் முக்கிய வேடத்தில் நடித்து வரும் ரஹ்மான், விஷாலுடன் ’துப்பறிவாளன் 2’ படத்திலும் நடித்து வருகிறார்.

தமிழ் மட்டுமின்றி தெலுங்கு மற்றும் மலையாளத்தில் ஒரு சில படங்களில் நடித்து வரும் ரஹ்மான், சம்பத் நந்தி என்பவர் இயக்கத்தில் கோபிசந்த் நடிக்கும் தெலுங்கு படத்தில் நடித்து வருகிறார் என்பதும், இந்த படத்தின் படப்பிடிப்பு இறுதிக்கட்டத்தில் உள்ளது என்பது குறிப்பிடத்தக்கது.

கடந்த 90கள் மற்றும் 2000களில் பிசியாக இருந்த நடிகர் ரஹ்மான் தற்போது 2021 புத்தாண்டில் மீண்டும் பிசியாகி உள்ளார் என்பது குறிப்பிடத்தக்கது.