வீட்டில் இருங்கள், உங்களை கையெடுத்து கும்பிடுகிறேன்: பிரபல குணச்சித்திர நடிகர்
- IndiaGlitz, [Thursday,April 09 2020]
தமிழகத்தில் கொரோனா வைரஸ் தாக்கம் நாளுக்கு நாள் அதிகரித்து வரும் நிலையில் சமூக விலகலை பலர் கடைபிடிக்காததே இதற்கு காரணம் என குற்றம் சாட்டப்பட்டு வருகிறது. இந்த நிலையில் திரையுலக பிரமுகர்கள் பலர் சமூக விலகல் குறித்த விழிப்புணர்வு வீடியோக்களை சமூக வலைத்தளங்கள் மூலம் அவ்வப்போது வெளியிட்டு வருகின்றனர். அந்த வகையில் தற்போது தமிழ் சினிமாவின் குணச்சித்திர நடிகர் எம்.எஸ்,பாஸ்கர் வீடியோ ஒன்றில் கூறியிருப்பதாவது:
நாம் அனைவரும் வீட்டில் இருந்தால், பெற்றோர்களுக்கு உதவியாக இருந்தால் இந்த வியாதியை ஒழித்துவிடலாம். மத்திய அரசாங்கத்திற்கும் மாநில அரசாங்கத்திற்கு நாம் ஒத்துழைப்பு கொடுக்க வேண்டும் என அனைவரையும் கேட்டுக்கொள்கிறேன். என்னைவிட நீங்கள் அனைவரும் வயதில் சிறியவர்களாக தான் இருப்பீர்கள் என நினைக்கின்றேன். இருப்பினும் நான் கையெடுத்துக் கும்பிட்டு உங்களை கேட்டுக் கொள்கிறேன். தயவு செய்து அரசாங்கமும் பெற்றோர்களும் சொல்வதை கேளுங்கள்.
இந்த வியாதியை ஒழிக்க உங்களாலான உதவி வீட்டைவிட்டு வெளியே வராமல் வீட்டுக்குள் இருந்தாலே போதும். காரணம் இல்லாமல் வெளியே வராமல் இருந்தால் நிச்சயம் இந்த வியாதியை ஒழித்துவிடலாம். நான் சொல்வதை தயவு செய்து கேளுங்கள். உங்கள் தகப்பன் மாதிரி நான் சொல்கிறேன்’ என்று கையெடுத்துக் கும்பிட்டு கேட்டுக் கொண்டுள்ளார்.
நடிகர் எம்.எஸ்.பாஸ்கர் கரம் கூப்பி கேட்கிறார்.. pic.twitter.com/zoEmLS2Q7x
— meenakshisundaram (@meenakshicinema) April 9, 2020