பாஜகவில் மேலும் ஒரு பிரபல நடிகர்: ராதாரவி தகவல்
- IndiaGlitz, [Wednesday,March 04 2020]
கடந்த சில மாதங்களாகவே கோலிவுட் துறையிலுள்ள பிரமுகர்கள் பலர் பாஜகவில் இணைந்து வருகின்றனர் என்பது குறிப்பிடத்தக்கது. சமீபத்தில்கூட நடிகை நமீதா மற்றும் நடிகர் ராதாரவி ஆகியோர் பாஜகவில் இணைந்தனர். இந்த நிலையில் பாஜகவில் மேலும் ஒரு முக்கிய நடிகர் இணைய இருப்பதாக ராதாரவி பேட்டி ஒன்றில் தெரிவித்துள்ளார்.
நேற்று பாஜக சார்பில் குடியுரிமை சீர்திருத்த சட்டத்திற்கு ஆதரவான போராட்டத்தில் கலந்து கொண்ட ராதாரவி அதன்பின்னர் கூறியபோது, ‘பாஜகவில் சேர்வதற்கு பல நடிகர்கள் தயாராக உள்ளதாகவும் இதுகுறித்து நடிகர் கார்த்திக்கிடம் தான் பேசி உள்ளதாகவும் அவர் விரைவில் பாஜகவில் இணைவார் என்றும் கூறியுள்ளார். அதுமட்டுமின்றி பாஜகவில் சேர்வதற்கு மேலும் பல நடிகர்கள் தயாராக இருப்பதாகவும் அவர்கள் இணைவது குறித்து அறிவிப்பு விரைவில் வரும் என்று கூறியுள்ளார்.
நடிகர் கார்த்திக் ஏற்கனவே தனிக் கட்சி நடத்தி வரும் நிலையில் அக்கட்சியை கலைத்துவிட்டு பாஜகவில் இணைவாரா? என்பதை பொறுத்திருந்துதான் பார்க்க வேண்டும்.