கார் விபத்தில் பிரபல நடிகரின் தந்தை மரணம்
- IndiaGlitz, [Wednesday,August 29 2018]
ஆந்திர மாநில முன்னாள் முதலமைச்சர் என்.டி.ராமாராவின் மகனும், பிரபல தெலுங்கு நடிகர் ஜூனியர் என்.டி.ஆரின் தந்தையுமான ஹரிகிருஷ்ணா சற்றுமுன் நடந்த சாலை விபத்தில் பரிதாபமாக உயிரிழந்தார். அவருடைய மறைவால் தெலுங்கு திரையுலகினர் அதிர்ச்சி அடைந்துள்ளனர்.
தெலுங்கான மாநிலத்தில் உள்ள நலகொண்டா அருகே ஹரிகிருஷ்ணா காரில் சென்று கொண்டிருந்தபோது கார் திடீரென டிரைவரின் கட்டுப்பாட்டை இழந்து விபத்துக்குள்ளானது. இந்த விபத்தில் படுகாயமடைந்த ஹரிகிருஷ்ணா உடனடியாக மருத்துவமனையில் தீவிர சிகிச்சை பிரிவில் அனுமதிக்கப்பட்டார். அவரது உயிரை காப்பாற்ற மருத்துவர்கள் தீவிர சிகிச்சை அளித்தும் சிகிச்சையின் பலனின்றி உயிரிழந்தார்.
கடந்த நான்கு ஆண்டுகளுக்கு முன் ஹரிகிருஷ்ணாவின் மகன் ஜானகிராமன் என்பவரும் இதே போன்று சாலை விபத்து ஒன்றில்தான் மரணம் அடைந்தார். ஒரே குடும்பத்தில் மகன், தந்தை என இருவரும் சாலை விபத்தில் மரணம் அடைந்திருப்பது அவரது குடும்பத்தினர்களை அதிர்ச்சியில் ஆழ்த்தியுள்ளது.