நடிகர் ஜீவா குடும்பத்துடன் சென்ற கார் விபத்து.. என்ன ஆச்சு?
- IndiaGlitz, [Wednesday,September 11 2024]
பிரபல தமிழ் நடிகர் ஜீவா தனது குடும்பத்துடன் காரில் சென்று கொண்டிருந்தபோது அந்த கார் விபத்து உள்ளானதாக வெளியாகியிருக்கும் செய்தி கோலிவுட் திரையுலகில் பரபரப்பை ஏற்படுத்தி உள்ளது.
தமிழ் திரையுலகின் முன்னணி நடிகர்களில் ஒருவரான ஜீவா இன்று தனது குடும்பத்தினருடன் சேலத்தில் இருந்து சென்னைக்கு காரில் சென்று கொண்டிருந்தார். அப்போது கள்ளக்குறிச்சி மாவட்டம் சின்னசேலம் என்ற பகுதிக்கு அவருடைய கார் வந்தபோது திடீரென விபத்துக்குள்ளானது.
காரின் குறுக்கே இருசக்கர வாகனம் திடீரென வந்ததால் சாலையின் தடுப்புச் சுவரில் ஜீவா சென்ற கார் மோதியதாக கூறப்படுகிறது. இந்த விபத்தில் ஜீவா உட்பட அவரது குடும்பத்தினருக்கு லேசான காயங்கள் ஏற்பட்டதாகவும் காரின் முன்பகுதி சேதம் அடைந்துள்ளதாகவும் தெரிகிறது.
இதனை அடுத்து ஜீவா தங்கள் குடும்பத்துடன் முதலுதவி சிகிச்சை எடுத்துக்கொண்டு அதன் பின் மீண்டும் சென்னை புறப்பட்டு சென்றதாக செய்திகள் வெளியாகி உள்ளன. இந்த விபத்து குறித்து காவல்துறையினர் விசாரணை செய்து வருவதாக கூறப்படுகிறது.