'சென்னை 600018, எங்கேயும் எப்போது, ராஜா ராணி, பலூன் உள்பட பல திரைப்படங்களில் நடித்தவர் நடிகர் ஜெய். இவர் நேற்றிரவு அதிக ஒலி எழுப்பிய கார் ஒன்றில் சென்று கொண்டிருந்தபோது சென்னை நுங்கம்பாக்கம் அருகே போக்குவரத்து போலீசாரிடம் பிடிபட்டார்.

அதிக ஒலி எழுப்பும் காரை பயன்படுத்த கூடாது என்றும் மீறினால் கார் பறிமுதல் செய்யப்படும் என்று போக்குவரத்து போலீசார் ஜெய்யிடம் கூறினார். இதனையடுத்து போலீசாரிடம் வருத்தம் தெரிவித்த நடிகர் ஜெய், இனி அதிக ஒலி எழுப்பும் காரை பயன்படுத்த மாட்டேன் என்று உறுதி அளித்தார். பின்னர் பொதுமக்களுக்கு ஒரு அறிவுரையும் கூறினார். அவர் கூறியதாவ்து:

அதிக ஒலி எழுப்பும் காரை யாரும் பயன்படுத்த வேண்டாம். அதிக ஒலி எழுப்பும் காரால் சாலை அருகில் உள்ள பள்ளி, கல்லூரி மற்றும் மருத்துவமனையில் இருப்பவர்களுக்கு தொந்தரவாக இருக்கும் என்றும் எனவே சுற்றுச்சூழலை பாதிக்கும் அதிக ஒலி எழுப்பும் காரை யாரும் பயன்படுத்த வேண்டாம் என்றும் அவர் வேண்டுகோள் விடுத்தார். ஜெய் வேண்டுகோள் விடுத்த இந்த வீடியோ சமூக வலைத்தளங்களில் வைரலாகி வருகிறது.