கொரோனாவுக்கு பலியான மேலும் ஒரு நடிகர்: அதிர்ச்சியில் திரையுலகம்
- IndiaGlitz, [Thursday,May 20 2021]
இந்தியா உள்பட உலகம் முழுவதும் கொரோனா வைரஸ் கடந்த ஒரு ஆண்டுக்கும் மேலாக மனித இனத்தையே ஆட்டிப்படைத்து வருகிறது. இந்த கொரோனாவால் லட்சக்கணக்கான உயிர்கள் உலகம் முழுவதும் பலியாகி உள்ளன என்பது குறிப்பிடத்தக்கது. குறிப்பாக தமிழகத்தை சேர்ந்த திரை உலக பிரமுகர்கள் அடுத்தடுத்து கொரோனா என்ற கொடிய அரக்கனுக்கு பலியாகியுள்ளது திரையுலக பிரமுகர்கள் மத்தியில் பெரும் அதிர்ச்சியை ஏற்படுத்தி உள்ளது
கடந்த சில நாட்களாக இயக்குனர் தாமிரா, இயக்குநர் கேவி ஆனந்த், இயக்குநர் எஸ்பி ஜனநாதன், நடிகர் நிதிஷ் வீரா உள்பட பல திரையுலக பிரமுகர்கள் அடுத்தடுத்து கொரோனாவுக்கு பலியாகியுள்ளனர். அந்த வகையில் இன்று மேலும் ஒரு நடிகர் கொரோனாவுக்கு பலியாகியுள்ள தகவல் வெளியாகியுள்ளது பெரும் அதிர்ச்சியை ஏற்படுத்தி உள்ளது
சற்றுமுன் வெளியான தகவலின்படி நடிகர் மற்றும் டப்பிங் யூனியன் உறுப்பினர் வீரமணி என்பவர் கொரோனா தொற்று காரணமாக கடந்த சில நாட்களாக சிகிச்சை பெற்று வந்த நிலையில் இன்று அவர் சிகிச்சை பலனின்றி காலமானதாக செய்திகள் வெளியாகி உள்ளது. இதனை அடுத்து திரையுலகினர் அவருக்கு இரங்கல் தெரிவித்து வருகின்றனர்.