ஃபேஸ்புக் லைவ்வில் சர்ச்சைக்குரிய கருத்துக்களை கூறிய நடிகர் அஜாஸ்கான் என்பவர் கைது செய்யப்பட்டதால் பெரும் பரபரப்பு ஏற்பட்டுள்ளது.

கொரோனா காரணமாக நாடு முழுவதும் ஊரடங்கு உத்தரவு பிறப்பிக்கப்பட்டிருக்கும் நிலையில் சூர்யா நடித்த ’ரத்த சரித்திரம்’ என்ற படத்தில் நடித்தவரும் பிக்பாஸ் நிகழ்ச்சியின் போட்டியாளர்களில் ஒருவருமான அஜாஸ்கான், பேஸ்புக் லைவ்வில் ரசிகர்களின் கேள்விக்கு பதிலளித்தார். அப்போது ரசிகர் ஒருவர் கேட்ட கேள்வி ஒன்றுக்கு சர்ச்சைக்குரிய வகையில் அவர் பதில் அளித்ததாக புகார் எழுந்தது.

இதனை அடுத்து மும்பை காவல்துறையினர் விசாரணை செய்ததாகவும், விசாரணையின் முடிவில் அவர் கைது செய்யப்பட்டதாகவும் செய்திகள் வெளிவந்துள்ளது. இரு சமூகங்களுக்கு இடையே பகைமையை வளர்த்ததாக அவர் மீது போலீசார் வழக்கு பதிவு செய்துள்ளதாக கூறப்படுகிறது. ஏற்கனவே இவர் கடந்த ஆண்டு ஜூலை மாதம் இதே போல் சமூகப் பிரச்சினை ஏற்படும் வகையில் வீடியோ ஒன்றை வெளியிட்டதற்காக அவர் கைது செய்யப்பட்டார் என்பது குறிப்பிடத்தக்கது.