ఓ సినిమా సెట్స్‌లో ఉండ‌గానే మ‌రో సినిమాకు గ్రీన్ సిగ్న‌ల్ ఇవ్వ‌డ‌మే కాకుండా.. సినిమా ముగియ‌గానే కొత్త సినిమాను స్టార్ట్ చేస్తున్నాడు మాస్ మ‌హారాజా ర‌వితేజ‌. అందులో భాగంగా ఇటీవ‌ల డైరెక్ట‌ర్ మారుతితో చెప్పిన క‌థ న‌చ్చ‌డంతో సినిమా చేయ‌డానికి ఆస‌క్తి చూపించాడు. ప్ర‌ముఖ నిర్మాణ సంస్థ యువీ క్రియేష‌న్స్ సినిమా చేయ‌డానికి రెడీ అయ్యింది కూడా. అయితే ర‌వితేజ రెమ్యున‌రేష‌న్ విష‌యంలో బెట్టు చేయ‌డంతో ప్రాజెక్ట్‌పై ర‌వితేజ ఆస‌క్తి చూపించ‌లేదు. దీంతో నిర్మాత‌లు ఇప్పుడు మ‌రో హీరోను ఈ సినిమాలో న‌టింప చేయ‌డానికి ప్ర‌య‌త్నాలు చేస్తున్న‌ట్లు వార్త‌లు వినిపిస్తున్నాయి. వివ‌రాల‌కు మేర‌కు యువీ క్రియేష‌న్స్‌కు స‌న్నిహితుడైన హీరో గోపీచంద్ ఇప్పుడు మారుతి ద‌ర్శ‌క‌త్వంలో సినిమా చేయ‌బోతున్నాడ‌ట‌.

ఈ సినిమాకు సంబంధించి మ‌రో ఆస‌క్తిక‌ర‌మైన వార్తొక‌టి నెట్టింట హ‌ల్ చల్ చేస్తుంది. అదేంటంటే.. మారుతి సినిమాలో హీరో లాయ‌ర్ పాత్ర‌లో క‌నిపిస్తాడు. డ‌బ్బు కోసం ఎలాంటి కేసునైనా వాదిస్తుంటాడు. అందుక‌నే ఈ సినిమా మారుతి ‘ప‌క్కా క‌మ‌ర్షియ‌ల్‌’ అనే టైటిల్‌ను కూడా అనుకున్నాడ‌ట‌. యాక్ష‌న్ ఇమేజ్ ఉన్న గోపీచంద్‌ను త‌న‌దైన ఎంట‌ర్‌టైన్‌మెంట్ యాడ్ చేసి ప‌క్కా క‌మ‌ర్షియ‌ల్ కోణంలో మారుతి చూపిస్తాడ‌న్న‌మాట‌. గోపీచంద్ డేట్స్‌ను ఇస్తే..ఇక సినిమాను అధికారికంగా ప్ర‌క‌టించడ‌మే త‌రువాయి అని ఇండ‌స్ట్రీ వ‌ర్గాల్లో టాక్ వినిపిస్తోంది.