రజనీ కోసమే ఒప్పుకున్నాడ‌ట
- IndiaGlitz, [Tuesday,March 13 2018]
డైలాగులు చెప్ప‌డంలో త‌న‌కు తానే సాటి. ఆయన మాటలు పలికే శైలికి ప్రేక్షకలోకం దాసోహం అంటుంది. ఆయనే.. బాలీవుడ్ విలక్షణ నటుడు నానా పాటేకర్. ఈ నటుడు తొలిసారిగా 'కాలా' చిత్రం ద్వారా కోలీవుడ్ లోకి అడుగుపెడుతున్నారు. కేవలం రజనీకాంత్ తో ఉన్న సాన్నిహిత్యం వలనే ఈ చిత్రాన్ని ఒప్పుకున్నానని ఈ డైలాగ్ కింగ్ చెప్పుకొచ్చారు.
ఈ సినిమా గురించి నానా మాట్లాడుతూ.. 'కాలా' చిత్రంలో ప్రతినాయకుని పాత్రలో నటించాలని తనని సంప్రదించారని తెలిపారు. అయితే.. త‌ను ఆసక్తి చూపకపోవడంతో రజనీ నేరుగా రంగంలోకి దిగారట. నానాను కలిసి స్క్రిప్ట్ వివరించి.. 'సినిమాలో నన్నెవరూ చూడరు" అని చెప్పి రజనీ ఒప్పించార‌ట.
ఆయన మంచితనం తెలిసినవాడిగా.. ఆయన మాట కాదనలేక.. రజనీ కోసమే ఈ చిత్రంలో నటించానని నానా చెప్పారు. ఇదిలా ఉంటే.. ఇటీవల విడుదలైన 'కాలా' ట్రైలర్‌కు మంచి స్పందన వస్తోంది. తమిళంతో పాటు, తెలుగు, హిందీ భాషల్లో తెరకెక్కిన ఈ చిత్రాన్ని పా.రంజిత్ రూపొందించారు. వండర్ బేర్ ఫిలిమ్స్ పతాకంపై రజనీ అల్లుడు ధనుష్ నిర్మించిన ఈ చిత్రం.. ఏప్రిల్ 27న ప్రపంచవ్యాప్తంగా విడుదల కానుంది.