அருள்நிதியின் 'ஆறாது சினம்'. ஒரு முன்னோட்டம்
- IndiaGlitz, [Thursday,February 25 2016]
கடந்த ஆண்டு அருள்நிதி நடித்த 'டிமாண்ட்டி காலனி' மற்றும் 'நாலு போலீஸும் நல்லா இருந்த ஊரும்' ஆகிய இரண்டு திரைப்படங்கள் ரிலீஸ் ஆனது மட்டுமின்றி புதுமாப்பிள்ளையாகவும் அவர் பதவியுயர்வு பெற்றார். இந்நிலையில் இந்த ஆண்டு அருள்நிதியின் நடிப்பில் வெளியாகவுள்ள முதல் திரைப்படமான 'ஆறாது சினம்' என்ற படம் நாளை வெளியாகவுள்ளது.
''ஆறுவது சினம்' என்றுதான் ஒளவையாரின் ஆத்திச்சூடியில் நாம் படித்திருக்கின்றோம். ஆனால் ''ஈரம்'' இயக்குனர் அறிவழகன் தேர்வு செய்த 'ஆறாது சினம்' என்ற டைட்டிலே படம் பார்க்க தூண்டும் வகையில் உள்ளது. 'ஈரம்', வல்லினம்' ஆகிய இரண்டு படங்களின் மூலம் தன்னுடைய திறமையை நிரூபித்த அறிவழகனின் மூன்றாவது படைப்புதான் இந்த ஆறாது சினம்
இந்த படத்தில் 'காக்கா முட்டை' நாயகி ஐஸ்வர்யா ராஜேஷ் நாயகியாக நடித்துள்ளார். அந்த படத்தில் இரண்டு குழந்தைகளுக்கு தாயாக ஒரு சேரிப்பெண்ணாக நடித்திருந்த ஐஸ்வர்யா, இந்த படத்தில் ஒரு குழந்தைக்கு அம்மாவாக, நகரத்து பெண்ணாக நடித்துள்ளதாக கூறப்படுகிறது. மேலும் இந்த படத்தின் இன்னொரு நாயகியாக ஐஸ்வர்யா தத்தா நடித்துள்ளார் என்பது குறிப்பிடத்தக்கது. இவர் ஏற்கனவே 'தமிழுக்கு எண் 1ஐ அழுத்தவும், 'பாயும் புலி' ஆகிய படங்களில் நடித்தவர் என்பது அனைவரும் அறிந்ததே.
டி.இமான் இசையமைத்துள்ள இந்த படத்தை ஸ்ரீதேனாண்டாள் பிலிம்ஸ் நிறுவனம் தயாரித்துள்ளது. ஏற்கனவே பல வெற்றிப்படங்களை தயாரித்து மற்றும் விநியோகம் செய்த அனுபவம் உள்ள பிரபல நிறுவனம் என்பதால் இந்த படத்தின் புரமோஷன்கள் பக்காவாக நடந்துள்ளன.
கமல்ஹாசனின் 'பாபநாசம்' படத்தை இயக்கிய பிரபல மலையாள இயக்குனர் ஜீத்துஜோசப் இயக்கிய 'மெமோரீஸ்' படத்தின் தமிழ் ரீமேக் படம் இது என்பது குறிப்பிடத்தக்கது. மலையாளத்தை போல தமிழிலும் இந்த படம் வெற்றி பெறுமா? என்பதை பொறுத்திருந்து பார்ப்போம்.