கமல்ஹாசனின் அடுத்த படம் ரிலீஸ் குறித்த தகவல்
- IndiaGlitz, [Saturday,January 04 2020]
கடந்த 2015ஆம் ஆண்டுக்குப் பின்னர் உலக நாயகன் கமல்ஹாசன் நடித்த விஸ்வரூபம்-2 என்ற ஒரே ஒரு திரைப்படம் மட்டுமே வெளிவந்து உள்ளதால் கமல் ரசிகர்கள் அவரது படங்கள் வெளியாக காத்திருக்கின்றனர். தற்போது தயாராகி வரும் இந்தியன் 2’ திரைப்படம் 2021 ஆம் ஆண்டு ஏப்ரல் மாதம் தான் வெளியாக உள்ளது என்பது குறிப்பிடத்தக்கது. எனவே கமலஹாசன் திரைப்படத்தின் ரிலீசுக்காக அவரது ரசிகர்கள் இன்னும் ஒரு ஆண்டுக்கும் மேல் காத்திருக்க வேண்டும் என்பது குறிப்பிடத்தக்கது.
இந்த நிலையில் கமல் ரசிகர்களுக்கு இன்ப அதிர்ச்சி அளிக்கும் வகையில் தற்போது அவருடைய படம் விரைவில் வெளியாக வாய்ப்பு இருப்பதாக செய்திகள் வெளிவந்துள்ளது. கமலஹாசன் நடிப்பில் சுரேஷ் கிருஷ்ணா இயக்கத்தில் கடந்த 2001 ஆம் ஆண்டு வெளியான ’ஆளவந்தான்’ திரைப்படம் தற்போது டிஜிட்டலில் ரீமாஸ்டர் செய்யப்பட்டு விரைவில் வெளியாக இருப்பதாக கூறப்படுகிறது.
மிக பிரமாண்டமாக உருவான இந்த படம் ரிலீஸானபோது வசூல் அளவில் படுதோல்வி அடைந்தது. ஆனாலும் பல்வேறு சர்வதேச திரைப்பட விழாக்களில் இந்த படம் கலந்து கொண்டு பெரும் பாராட்டைப் பெற்றது. சமீபத்தில் பிரபல ஹாலிவுட் இயக்குனர் ஒருவர் ஆளவந்தான் படத்தை பார்த்து இன்ஸ்பிரேஷன் ஆகி தான் ஒரு சில காட்சிகளை தன்னுடைய படத்தில் வைத்ததாக பேட்டி ஒன்றில் கூறியிருந்தார்.
மேலும் தொலைக்காட்சிகளில் இந்த படம் திரையிடப்படும்போது நல்ல வரவேற்பை பெற்று வருகிறது என்பது குறிப்பிடத்தக்கது. இதனையடுத்து இந்த படத்தை டிஜிட்டலில் உருவாக்கி விரைவில் திரையிட படக்குழுவினர் திட்டமிட்டுள்ளனர். இது குறித்த அறிவிப்பு விரைவில் வெளியாகும் என்று கூறப்படுகிறது.
கமலஹாசன் இரண்டு வித்தியாசமான வேடங்களில் நடித்துள்ள இந்த படத்தில் ரவீனா டாண்டன் மற்றும் மனிஷா கொய்ராலா நாயகிகளாக நடித்து இருந்தனர் என்பது குறிப்பிடத்தக்கது.