தாய் என்பவர் உலகிலேயே மிகவும் புனிதமான உறவு என்றும், ஒரு தாய் தனது குழந்தைகளுக்காக உயிரையும் கொடுப்பார் என்றும் தான் நாம் இதுவரை கேள்விப்பட்டிருக்கின்றோம். ஆனால் கேரளாவில் உள்ள ஒரு பெண், கள்ளக்காதலுக்காக தான் பெற்ற குழந்தை மற்றும் பெற்றோர்களை கொலை செய்து தாய் இனத்திற்கே ஒரு களங்கத்தை ஏற்படுத்தியுள்ளார். 

கேரள முதல்வர் பினராயி விஜயன் அவர்களின் சொந்த ஊரான தலச்சேரி பினராய் என்ற பகுதியை சேர்ந்த சவுமியா என்பவர் கணவர் மற்றும் ஐஸ்வர்யா என்ற மகளுடன் வாழ்ந்து வந்தார். இந்த நிலையில் சவுமியா தான் வசிக்கும் இடத்தின் பக்கத்தில் உள்ள வாலிபர்கள் சிலருடன் கள்ள உறவு வைத்திருந்ததாக தெரிகிறது. இதனை கண்டித்து பார்த்த கணவர், ஒரு கட்டத்தில் சவுமியாவை விட்டு பிரிந்து சென்றுவிட்டார்.

கணவரை பிரிந்தவுடன் பல வாலிபர்களுடன் கள்ளக்காதலில் சவுமியா ஈடுபட்டிருந்த நிலையில் இந்த உறவை குழந்தை ஐஸ்வர்யா ஒருமுறை பார்த்து, சவுமியாவின் பெற்றோரிடம் கூறியுள்ளதாம், பெற்றோர்கள் சவுமியாவை கண்டித்துள்ளனர். தனது கள்ளக்காதலுக்கு பெற்றோர் மற்றும் குழந்தை இடைஞ்சலாக இருந்ததால் மூவரையும் கொல்ல சவுமியா திட்டமிட்டார்.

மூன்று பேர்களையும் ஒரு குறிப்பிட்ட இடைவெளியில் சாப்பாட்டில் விஷம் வைத்து கொலை செய்ததாக கூறப்படுகிறது, சவுமியா குடும்பத்தில் அடுத்தடுத்து மரணங்கள் நிகழ்ந்ததால் சந்தேகம் அடைந்த அக்கம்பக்கத்தில் உள்ளவர்கள் காவல்துறையினர்களிடம் புகார் அளித்தனர். காவல்துறையினர்கள் சவுமியாவை விசாரணை செய்ததில் முன்னுக்கு பின் முரணாக பதில் கூறியதாகவும், தனது பெற்றோர் மற்றும் மகள் இறந்ததற்கு தன் வீட்டில் உள்ள கிணற்றில் அமிலம் இருந்ததே காரணம் என்றும் கூறியுள்ளதாகவும் தெரிகிறது. ஆனால் கிணற்றை சோதனை செய்தபோது அவர் கூறியது பொய் என தெரிந்தது. பின்னர் சவுமியாவை போலீசார் ஸ்பெஷலாக விசாரணை செய்ததில் தனது கள்ளக்காதலுக்கு இடைஞ்சலாக இருந்த பெற்றோர்களை மீன் குழம்பில் விஷம் வைத்தும், மகளுக்கு மீன் பொறியலில் விஷம் வைத்து கொலை செய்ததாக ஒப்புக்கொண்டார். இதனையடுத்து அவர் கைது செய்யப்பட்டு சிறையில் அடைக்கப்பட்டார். 

மேலும் சவுமியாவுக்கு விஷம் வாங்கி கொடுத்த வாலிபர் உள்பட அவருடன் தொடர்பில் இருந்த ஒருசில வாலிபர்களுடனும் போலீசார் விசாரணை செய்து வருகின்றனர்.