தனுஷ் ரசிகர்களுக்கு கிடைக்கும் தீபாவளி விருந்து
- IndiaGlitz, [Tuesday,October 17 2017]
தனுஷ் தற்போது வெற்றிமாறன் இயக்கத்தில் 'வடசென்னை' மற்றும் கவுதம் மேனன் இயக்கத்தில் 'எனை நோக்கி பாயும் தோட்டா' ஆகிய படங்களில் நடித்து வருகிறார். இரண்டு படங்களின் படப்பிடிப்புகளும் இறுதிக்கட்டத்தை நெருங்கியுள்ள நிலையில் 'எனை நோக்கி பாயும் தோட்டா' இயக்குனர் கவுதம் மேனன், நாளைய தீபாவளி தினத்தில் தனுஷ் ரசிகர்களுக்கு இசை விருந்து ஒன்றை அளிக்க உள்ளார்
'எனை நோக்கி பாயும் தோட்டா' படத்தின் இசையமைப்பாளர் இதுவரை மிஸ்டர் எக்ஸ் என்று அழைத்து வரப்படும் நிலையில் இந்த மிஸ்டர் எக்ஸ் யார் என்று இதுவரை காத்து வந்த ரகசியத்தை நாளை வெளியிடவுள்ளார். அதுமட்டுமின்றி ஏற்கனவே இந்த படத்தின் சிங்கிள் பாடல் ஒன்று சமீபத்தில் வெளியாகி ஹிட்டானது என்பது அனைவரும் அறிந்ததே. 'மறுவார்த்தை பேசாதே, மடிமீது தூங்கிடு' என்ற இந்த சிங்கிள் பாடலின் இன்னொரு வடிவப்பாடல் நாளை வெளியிடவுள்ளதாக இயக்குனர் கவுதம் மேனன் தனது சமூக வலைத்தளத்தில் அறிவித்துள்ளார். பாடலாசிரியர் தாமரை எழுதிய இந்த பாடல் தனுஷ் ரசிகர்களுக்கான தீபாவளி விருந்தாக இருக்கும் என்று கருதப்படுகிறது.
தனுஷ், மேகா ஆகாஷ், சுனைனா உள்பட பலர் நடித்துள்ள இந்த படத்தை 'ஒன்றாக எண்டர்டெயின்மெண்ட்' நிறுவனம் தயாரித்துள்ளது. ஜாமோன் ஜான் ஒளிப்பதிவில் ப்ரவீன் ஆண்டனி படத்தொகுப்பில் உருவாகியுள்ள இந்த படம் அடுத்த வருடம் வெளியாகும் என்று எதிர்பார்க்கப்படுகிறது.
.