விஜய் போலவே மாணவ, மாணவிகளுக்கு விழா எடுக்க திட்டமிட்டுள்ள மாஸ் நடிகர்..!
- IndiaGlitz, [Saturday,July 01 2023]
தளபதி விஜய் கடந்த சில நாட்களுக்கு முன்னர் தமிழ்நாட்டில் உள்ள அனைத்து மாவட்டங்களிலும் முதல் மூன்று இடங்கள் எடுத்த 10ம் வகுப்பு மற்றும் 12ம் வகுப்பு மாணவ மாணவிகளுக்கு சிறப்பு பரிசுகள் கொடுத்து கௌரவித்தார் என்பதை பார்த்தோம்.
இந்த நிகழ்ச்சியில் அவர் சுமார் 1500 மாணவ மாணவிகளுக்கு தன் கையாலே 10 மணி நேரத்திற்கு மேலாக நின்று பரிசுகளை கொடுத்தார் என்பதும் அதன் பிறகு அவர் பேசிய 11 நிமிட பேச்சு இணையதளங்களில் பரபரப்பை ஏற்படுத்தியது என்பதையும் பார்த்தோம். குறிப்பாக அவர் பெரியார், அம்பேத்கர், காமராஜர் ஆகியோர்களை பற்றி படிக்க வேண்டும் என்றும் மாணவர்களுக்கு அறிவுரை கூறியது தமிழக அரசியல் வட்டாரத்தில் பரபரப்பை ஏற்படுத்தியது.
இந்த நிலையில் விஜய்யை அடுத்து மாணவ மாணவிகளுக்கு பரிசளிக்கும் விழா ஒன்றை நடத்த மாஸ் நடிகர்களில் ஒருவரான விஷால் திட்டமிட்டுள்ளதாக கூறப்படுகிறது. ஏற்கனவே விஷால், தனது தேவி அறக்கட்டளை மூலம் ஏழை எளிய மாணவ மாணவிகளின் படிப்புக்கு உதவி செய்து வருகிறார். இந்த அறக்கட்டளையின் மூலம் சுமார் 300 பேர் கல்லூரிகளில் படித்து வரும் நிலையில் அவர்களை அழைத்து விழா எடுக்க திட்டமிட்டுள்ளதாக கூறப்படுகிறது.
விஜய் விழா போலவே இந்த விழாவில் மாணவ மாணவிகளை மட்டுமின்றி அவர்களின் பெற்றோர்களும் இந்த விழாவில் கலந்து கொள்ள அழைக்கப்படுவார்கள் என்று எதிர்பார்க்கப்படுகிறது.