ஏ ஆர் முருகதாஸ் இயக்கத்தில், சிவகார்த்திகேயன் நடிப்பில் உருவாகி வரும் ’எஸ்கே 23’ படத்தின் படப்பிடிப்பு விறுவிறுப்பாக நடைபெற்று வரும் நிலையில் இந்த படத்தில் பிரபல மலையாள நடிகர் ஒருவர் இணைந்துள்ளதாக தகவல் வெளியாகியுள்ளது.

முதல்முறையாக ஏ ஆர் முருகதாஸ் மற்றும் சிவகார்த்திகேயன் இணையும் ’எஸ்கே23 ’ படத்தின் படப்பிடிப்பு கடந்த சில மாதங்களாக நடைபெற்று வருகிறது என்பதும் இந்த படத்தில் சிவகார்த்திகேயன் ஜோடியாக ருக்மணி வசந்த் நடித்து வருகிறார் என்பதும் இன்னொரு நாயகியாக கீர்த்தி சனோன் நடித்து வருகிறார் என்பதையும் ஏற்கனவே பார்த்தோம்.

இந்த படம் சுமார் 150 கோடி ரூபாய் பட்ஜெட்டில் உருவாகி வருவதாக கூறப்படும் நிலையில் இந்த படத்திற்கு அனிருத் இசையமைக்கிறார் என்பதும் இந்த படத்தின் படப்பிடிப்பு நிறைவு கட்டத்தை எட்டி விட்டதாகவும் கூறப்படுகிறது.

இந்த நிலையில் இந்த படத்தில் சமீபத்தில் விஜய் நடிப்பில் ஏஆர் முருகதாஸ் இயக்கத்தில் உருவான ‘துப்பாக்கி’ படத்தின் வில்லன் வித்யூத் ஜம்வால் நடிக்க உள்ளார் என்ற செய்திகள் வெளியான நிலையில் தற்போது பிரபல மலையாள நடிகர் பிஜு மேனன் இணைய இருப்பதாக கூறப்படுகிறது. இவர் ஏற்கனவே தமிழில் ’மஜா’ ’தம்பி’ ’பழனி’ ’அரசாங்கம்’ ’போர்க்களம்’ உள்ளிட்ட படங்களில் நடித்த நிலையில் நீண்ட இடைவெளிக்கு பிறகு மீண்டும் தமிழுக்கு வருகிறார் என்பது குறிப்பிடத்தக்கது.

’எஸ்கே 23’ படத்தில் பிரபல நடிகர்கள் ஒவ்வொருவராக இணைந்து வருவதை அடுத்து இந்த படத்திற்கு எதிர்பார்ப்பும் அதிகரித்து உள்ளது.