சமீபத்தில் பாகிஸ்தான் ராணுவத்திடம் சிக்கி கைது செய்யப்பட்ட தமிழகத்தை சேர்ந்த இந்திய ராணுவ வீரர் அபிநந்தனை விடுவிக்க நேற்று பாகிஸ்தான் பிரதமர் இம்ரான்கான் ஒப்புக்கொண்டார். மத்திய அரசு எடுத்த ராஜதந்திரத்தின் அடிப்படையில் உலக நாடுகளின் நிர்ப்பந்தத்தினால் பாகிஸ்தானால் விடுவிக்கப்படும் அபிநந்தன் இன்று வாகா எல்லையில் இந்திய ராணுவத்திடம் ஒப்படைக்கப்படுகிறார்.

இதனையடுத்து அபிநந்தனை வரவேற்க நேற்றிரவே சென்னையில் இருந்து அவரது பெற்றோர்கள் டெல்லி சென்றிருக்கும் நிலையில் வாகா எல்லையில் அபிநந்தனை வரவேற்க ஏராளமான பொதுமக்களும் குவிந்துள்ளனர். இவர்கள் அனைவரும் இந்தியா மற்றும் அபிநந்தனுக்கு ஆதரவாக கோஷமிட்டு அபிநந்தன் விடுதலையை ஒரு திருவிழா போல் கொண்டாடி வருகின்றனர்.

வாகா எல்லையில் ஆண்கள், பெண்கள், சிறுமிகள், சிறுவர்கள், பெரியவர்கள், என பலர் குவிந்திருப்பதை அடுத்து அந்த பகுதியில் அசம்பாவிதம் ஏதும் ஏற்படாமல் இருக்க முன்னெச்சரிக்கை நடவடிக்கையாக பாதுகாப்பு அதிகரிக்கப்பட்டுள்ளது.