அல்லு அர்ஜுன் நடித்த ’புஷ்பா’ திரைப்படத்தில் சமந்தா ஒரு பாடலுக்கு நடனம் ஆடியிருப்பார் என்பதும் ’ஓ சொல்றியா மாமா’ என்ற இந்த பாடலை நடிகை ஆண்ட்ரியா பாடியிருப்பார் என்பதும் தெரிந்ததே. இந்த பாடல் பட்டி தொட்டி எங்கும் மிகப்பெரிய அளவில் ஹிட்டான நிலையில் சமந்தா இந்த ஒரு பாடலுக்காகவே கோடி கணக்கில் சம்பளம் வாங்கியதாகவும் கூறப்பட்டது.

இந்த நிலையில் தற்போது ’புஷ்பா 2’ படத்தின் படப்பிடிப்பு விறுவிறுப்பாக நடைபெற்று வரும் நிலையில் இந்த படத்தில் ’ஓ சொல்றியா மாமா’ பாடலைப் போன்ற ஒரு பாடலை வைக்க படக்குழுவினர் திட்டமிட்டுள்ளனர்.

’புஷ்பா 2’ படத்தில் இடம்பெற்ற இந்த பாடலுக்கு சமந்தா ஆடவில்லை என்பது ஏற்கனவே உறுதி செய்யப்பட்ட நிலையில் வேறு சில நடிகைகளிடம் பேச்சுவார்த்தை நடந்ததாகவும் தற்போது தெலுங்கில் மிகப்பெரிய அளவில் வளர்ந்து வரும் நடிகையாக இருக்கும் ஸ்ரீ லீலா இந்த பாடலுக்கு நடனமாட இருப்பதாகவும் தகவல்கள் வெளியாகி உள்ளன. அமெரிக்காவை சேர்ந்த ஸ்ரீ லீலா தற்போது தெலுங்கில் முன்னணி நடிகையாக உருவாகி வருகிறார் என்பது குறிப்பிடத்தக்கது.

இந்த பாடலின் படப்பிடிப்பு விரைவில் நடைபெறும் என்றும் முதல் பாகத்தில் இருந்த பாடலை விட இரு மடங்கு இந்த பாடல் வரவேற்பு பெறும் வகையில் கிளாமர் மற்றும் குத்துப்பாட்டாக உருவாக இருப்பதாகவும் கூறப்படுகிறது.

சுமார் 500 கோடி ரூபாய் பட்ஜெட்டில் உருவாகி வரும் ’புஷ்பா 2’ படத்தில் அல்லு அர்ஜுன், ஃபகத் பாசில், ராஷ்மிகா மந்தனா, ஜெகபதி பாபு, பிரகாஷ் ராஜ், சுனில் உள்பட பலர் நடித்து வருகின்றனர். சுகுமார் இயக்கத்தில் தேவிஸ்ரீ பிரசாத் இசையில் இந்த படம் உருவாகி வருகிறது என்பது குறிப்பிடத்தக்கது.