நடிகர் விஜய் நடித்த பிகில் திரைப்படம் கடந்த வெள்ளியன்று வெளியாகி திரையரங்குகளில் வெற்றிகரமாக திரையிடப்பட்டு வரும் நிலையில் கடந்த சனிக்கிழமை விஜய் வீட்டில் வெடிகுண்டு வைக்கப்பட்டுள்ளதாக சென்னை மாநகர காவல்துறை கட்டுப்பாட்டு அறைக்கு ஒரு தொலைபேசி அழைப்பு வந்தது. இதனால் போலீசார் அதிர்ச்சி அடைந்தனர். 

இந்த மிரட்டல் வெடிகுண்டு குறித்து உடனடியாக உயர் அதிகாரிகளுக்கு தகவல் கொடுத்த போலீசார் உயர் அதிகாரிகளின் உத்தரவின்பேரில் சென்னை சாலிகிராமத்தில் உள்ள நடிகர் விஜய்யின் தந்தை சந்திரசேகர் வீட்டுக்கும் சென்னை அருகே கிழக்கு கடற்கரை சாலையில் உள்ள விஜய்யின் வீட்டிற்கும் பாதுகாப்பு பாதுகாப்பு அளித்தனர். மேலும் இரண்டு வீடுகளையும் வெடிகுண்டு நிபுணர்களால் சோதனை செய்யப்பட்டு அதன் பின்னர் அங்கு வெடிகுண்டு எதுவும் இல்லை என்பது உறுதி செய்யப்பட்டது. 

இந்தநிலையில் வெடிகுண்டு மிரட்டல் விடுத்த மர்ம நபரை சைபர் கிரைம் போலீசார் தேடி வந்த நிலையில் சென்னை போரூர் அருகே உள்ள ஆலப்பாக்கம் என்ற பகுதியைச் சேர்ந்த இளைஞர் ஒருவரை பிடித்து விசாரணை செய்து வருகின்றனர். அந்த இளைஞரிடம் நடத்திய விசாரணையில் அவர் முன்னுக்குப் பின் முரணான பதில்களை தெரிவித்து வருவதாக போலீஸ் வட்டாரங்கள் தெரிவித்துள்ளது.