ஒரே நேரத்தில் இரண்டு பிரபலங்கள் வீட்டிற்கு வெடிகுண்டு மிரட்டல்: தமிழ் திரையுலகில் பரபரப்பு
- IndiaGlitz, [Tuesday,October 13 2020]
அரசியல் மற்றும் தமிழ் திரையுலக பிரபலங்களின் வீடுகளுக்கு வெடிகுண்டு மிரட்டல் விடுப்பது கடந்த சில மாதங்களாக சர்வசாதாரணமாக நடைபெற்று வருகிறது. ஏற்கனவே ரஜினிகாந்த், விஜய், சூர்யா உள்பட சில திரையுலக பிரபலங்களின் வீடுகளுக்கு வெடிகுண்டு மிரட்டல் விடப்பட்டது என்பதும் அதன் பின்னர் அது புரளி என்பதும் கண்டுபிடிக்கப்பட்டது
இந்த நிலையில் தற்போது இன்று ஒரே நாளில் நடிகர் தனுஷ் மற்றும் நடிகரும் அரசியல்வாதியுமான விஜயகாந்த் ஆகிய இருவருடைய வீட்டிற்கும் வெடிகுண்டு மிரட்டல் விடுக்கப்பட்டது பெரும் பரபரப்பை ஏற்படுத்தி உள்ளது
காவல்துறை கட்டுப்பாட்டு அறைக்கு மர்ம நபர் ஒருவர் அழைப்பு விடுத்து அபிராமபுரத்தில் உள்ள நடிகர் தனுஷ் வீட்டில் வெடிகுண்டு வைத்திருப்பதாக மிரட்டல் விடுத்துள்ளார். அதேபோல் விஜயகாந்த் வீட்டிற்கும் வெடிகுண்டு மிரட்டல் விடுத்துத்துள்ளதாக தெரிகிறது. மேலும் தனுஷ் மற்றும் விஜயகாந்த் வீட்டுக்கு வெடிகுண்டு மிரட்டல் விடுத்துள்ளது ஒரே நபர் என்று கண்டுபிடிக்கப்பட்டுள்ளது
இதனை அடுத்து மோப்பநாய் வெடிகுண்டு தடுப்பு பிரிவுகள் இருவரது வீட்டில் சோதனை செய்ததில் புரளி என்பது தெரியவந்தது. இந்த நிலையில் தற்போது வெடிகுண்டு வைக்கப்பட்டதாக போன் மூலம் மிரட்டல் விடுத்த அந்த நபரை போலீசார் தேடி வருகின்றனர்