రెండు తేదీలు.. ఎనిమిది జోన‌ర్స్‌
- IndiaGlitz, [Friday,December 15 2017]
సంక్రాంతి పండగ వచ్చిందంటే సాధారణ ప్రజానీకం నుంచి సినీ ఇండస్ట్రీ వరకు అందరికీ పండగే. ఈ సంక్రాంతికి పవన్ కల్యాణ్, బాలకృష్ణ, రవితేజ వంటి అగ్ర క‌థానాయ‌కుల‌తో పాటు తమిళ స్టార్ హీరో సూర్య కూడా తెలుగుతెరపై సందడి చేయనున్నారు. ఈ సారి సంక్రాంతిలాగే జాతీయ పండుగ జనవరి 26, అలాగే మ‌హాశివ‌రాత్రి సంద‌ర్భంగా ఫిబ్రవరి 9న కూడా చెప్పుకోద‌గ్గ సంఖ్య‌లో సినిమాలు సందడి చేయనున్నాయి. ఈ చిత్రాలన్నీ కూడా వేటికవే ప్రత్యేకమైనవి కావ‌డం విశేషం.
ఒక్కొక్క జోనర్లో రాబోతున్న ఈ సినిమాలపై ఒక కన్నేస్తే.. జనవరి 26న అనుష్క-అశోక్ (దర్శకుడు) 'భాగమతి' (థ్రిల్లర్ మూవీ), మంచు విష్ణు-జి.నాగేశ్వర రెడ్డి (దర్శకుడు) 'ఆచారి అమెరికా యాత్ర' (కామెడీ ఎంటర్‌టైనర్), సందీప్ కిషన్-మంజుల ఘ‌ట్ట‌మ‌నేని (ద‌ర్శ‌కురాలు) 'మనసుకు నచ్చింది' (లవ్,రొమాంటిక్ చిత్రం), విశాల్-పి.ఎస్.మిత్రన్ (దర్శకుడు) 'అభిమన్యుడు' (యాక్షన్ థ్రిల్లర్), కమల్ హాసన్ స్వీయ దర్శకత్వంలో న‌టించిన 'విశ్వరూపంII' (స్పై థ్రిల్లర్) రిలీజ్ కానుండ‌గా.. ఫిబ్రవరి 9న వరుణ్ తేజ్-వెంకీ అట్లూరి (దర్శకుడు) 'తొలిప్రేమ' (రొమాంటిక్ ఎంటర్‌టైనర్), మోహన్ బాబు-మదన్ (దర్శకుడు) 'గాయత్రి' (ఫ్యామిలీ డ్రామా), నిఖిల్-శరణ్ కొప్పిశెట్టి (దర్శకుడు) 'కిర్రక్ పార్టీ' (యూత్ ఫుల్ ఎంటర్‌టైనర్) విడుదల అవుతున్నాయి.
ఇలా ఈ రెండు తేదీల్లో ఎనిమిది వేరువేరు జోనర్ల సినిమాలు విడుదల కానున్నాయి.