தமிழகத்தில் 771, சென்னையில் 324: இதுவரை இல்லாத கொரோனா பாதிப்பு!
- IndiaGlitz, [Wednesday,May 06 2020]
தமிழகத்தில் கொரோனா வைரஸ் பாதிப்பு நாளுக்கு நாள் அதிகரித்து வருகிறது என்பதும் குறிப்பாக சென்னையில் கோயம்பேடு மார்க்கெட் மற்றும் சமூக விலகலை கடைபிடிக்காதது ஆகியவை காரணமாக மிக அதிக பாதிப்பு இருந்து வருகிறது என்பதும் தெரிந்ததே.
இந்த நிலையில் இன்று கொரோனாவால் பாதிக்கப்பட்டவர்களின் எண்ணிக்கை குறித்து தமிழக சுகாதாரத்துறை சற்றுமுன் அறிவித்துள்ளது. இதன்படி தமிழகத்தில் இன்று மட்டும் புதியதாக 771 பேர்கள் கொரோனாவால் பாதிக்கப்பட்டுள்ளனர். இதனையடுத்து தமிழகத்தில் இதுவரை மொத்தம் 4829 பேர்கள் கொரோனாவால் பாதிக்கப்பட்டுள்ளனர்.
இன்று கொரோனாவால் பாதிக்கப்பட்டவர்களில் சென்னையில் மட்டும் 324 பேர்கள் என்பதும் இதனையடுத்து சென்னையில் மொத்தம் 2328 பேர்கள் பாதிக்கப்பட்டுள்ளனர் என்பதும் குறிப்பிடத்தக்கது. சென்னையை அடுத்து அரியலூரில் இன்று மட்டும் 188 பேர் கொரோனாவால் பாதிக்கப்பட்டுள்ளனர். மேலும் கடலூரில் 95 பேர்கள், காஞ்சிபுரத்தில் 45 பேர்கள், திருவள்ளூரில் 34 பேர்கள், மதுரையில் 20 பேர்கள் கொரோனாவுக்கு பாதிக்கப்பட்டுள்ளனர்.
மேலும் தமிழகத்தில் இன்று மட்டும் கொரோனாவால் 2 பேர்கள் பலியாகியுள்ளதால் கொரோனாவுக்கு மொத்தம் 35 பேர்கள் பலியாகியுள்ளனர். அதேபோல் இன்று கொரோனாவில் இருந்து குணமடைந்தவர்களின் எண்ணிக்கை 31 பேர்கள் என்பதும் இதனையடுத்து தமிழகத்தில் மொத்தம் 1516 பேர்கள் குணமாகியுள்ளனர் என்பதும் குறிப்பிடத்தக்கது.
தமிழகத்தில் இன்று 13281 பேர்களுக்கு கொரோனா பரிசோதனை செய்யப்பட்டுள்ளது என்பதும், மொத்தம் 178,472 பேர்களுக்கு பரிசோதனை செய்யப்பட்டுள்ளது என்பதும் குறிப்பிடத்தக்கது.