Nampally Fire Accident: నాంపల్లిలో భారీ అగ్నిప్రమాదం.. ఏడుగురు సజీవదహనం
- IndiaGlitz, [Monday,November 13 2023]
హైదరాబాద్‌లోని నాంపల్లిలో భారీ అగ్నిప్రమాదం సంభవించింది. బజార్‌ఘాట్‌లోని ఓ రసాయన గోదాంలో ఐదో అంతస్తు వరకు మంటలు వ్యాపించాయి. ఈ ప్రమాదంలో ఏడుగురు సజీవ దహనంకాగా.. ముగ్గురికి తీవ్ర గాయాలయ్యాయి. క్షతగాత్రులను స్థానికులు హుటాహుటిన ఆస్పత్రికి తరలించారు. సమాచారం అందుకున్న అగ్నిమాపక సిబ్బంది నాలుగు ఫైరింజన్ల సాయంతో మంటలను అదుపులోకి తెస్తున్నారు.
జీహెచ్‌ఎంసీ, ఎన్డీఆర్ఎఫ్‌ సిబ్బంది సహాయ చర్యలు చేపట్టారు. నిచ్చెనల సహాయంతో భవనంలోని మంటల్లో చిక్కుకున్న 15 మందిని రక్షించారు. మృతుల సంఖ్య పెరిగే అవకాశం ఉన్నట్లు తెలుస్తోంది. గ్రౌండ్‌ఫ్లోర్‌లో మెకానిక్ గ్యారేజ్‌ ఉంది. అక్కడ కారు రిపేర్ చేస్తుండగా మంటలు వ్యాపించాయి. అదే సమయంలో అక్కడ డీజిల్‌, కెమికల్ డ్రమ్ములు ఉండటంతో మంటలు వాటికి వ్యాపించి ప్రమాద తీవ్రత భారీగా పెరిగింది. దీంతో పక్కనే అపార్ట్‌మెంట్లలో ఉంటున్నవారు భయాందోళనకు గురయ్యారు.
తొలుత కెమికల్ గోదాంలో అగ్ని ప్రమాదం జరిగిందని ఆ తర్వాత అపార్ట్‌మెంట్‌లోకి మంటలు వ్యాపించాయని డీసీపీ వెంకటేశ్వర్లు తెలిపారు. గ్రౌండ్ ఫ్లోర్‌లో డీజల్ డ్రమ్ముల్లో మంటలు కారణంగా ప్రమాదం జరిగినట్లు వెల్లడించారు. కారు రిపేర్ చేస్తుండగా ఒక్కసారిగా మంటలు చెలరేగి అపార్ట్‌మెంట్‌లోని పైఅంతస్తులకు వ్యాపించాయన్నారు. మూడు, నాలుగు అంతస్తుల్లో కొన్ని కుటుంబాలు అద్దెకు ఉంటున్నాయని చెప్పారు. పొగ వల్ల ఊపిరాడక కొందరు చనిపోయారని పేర్కొన్నారు. మృతుల్లో ముగ్గురు మహిళలు ఉన్నారని డీసీపీ వివరించారు.