பெங்களூரின் மையப்பகுதியான கலாசிபாளையம் என்ற பகுதியில் இயங்கி வந்த மதுபான விடுதியில் அதிகாலை நேரத்தில் ஏற்பட்ட தீ விபத்து காரணமாக விடுதியில் தூங்கிக்கொண்டிருந்த ஐந்து பேர் உடல்கருகி பரிதாபமாக மரணம் அடைந்தனர். இவர்களில் ஒருவர் பெண் என்பது குறிப்பிடத்தக்கது.

பெங்களூரில் வெளியூர் மற்றும் வெளி மாநிலங்களுக்கு செல்லும் ஆம்னி பஸ்கள் இயங்கி கொண்டிருக்கும் பகுதியான கலாசிபாளையம் பகுதியில் 24 மணி நேரமும் மக்கள் நடமாட்டம் இருக்கும். இந்த பகுதியில் உள்ள தனியார் பார் மற்றும் ரெஸ்டாரெண்ட் ஒன்றில் இன்று அதிகாலை 2.30 மணியளவில் திடீர் தீவிபத்து ஏற்பட்டது. தீ திடீரென நாலாபுறமும் பரவியதால் இந்த விடுதியில் தூங்கிக்கொண்டிருந்த ஐந்து பேர் விடுதியில் இருந்து வெளியேற முடியாமல் பரிதாபமாக உயிரிழந்தனர்.

இதுகுறித்து தகவல் அறிந்த தீயணைப்பு மற்றும் மீட்புப்படையினர் விரைந்து வந்து தீயை கட்டுப்படுத்தும் பணியில் ஈடுபட்டனர். பின்னர் நடந்த விசாரணையில் இந்த தீவிபத்தில் மரணம் அடைந்தர்களின் அடையாளம் காணப்பட்டது. சுவாமி, பிரசாத், மகேஷ் (தும்கூர்), மஞ்சுநாத் (ஹசன்), கீர்த்தி (மாண்டியா) ஆகியோர்கள் மரணம் அடைந்துள்ளதாகவும் தீவிபத்துக்கான காரணம் இதுவரை தெரியவில்லை என்றும் அதுகுறித்து விசாரணை நடந்து வருவதாகவும் போலீசார் தெரிவித்தனர்.