ఎప్పుడో జులై 31 తేదికి రావాల్సిన రామ్ చరణ్, అల్లు అర్జున్ ల సినిమా ‘ఎవడు’.. రాష్ట్రంలో ప్రస్తుతం నెలకొన్న పరిస్థితుల వల్ల వాయిదాలు పడిన సంగతి విదితమే. అన్నీ కుదిరితే.. ఈ సినిమా విజయదశమి సందర్భంలో విడుదల కావచ్చు. దిల్ రాజు నిర్మించిన ఈ సినిమాకి వంశీ పైడిపల్లి దర్శకుడు. శ్రుతి హాసన్, ఎమీ జాక్సన్ హీరోయిన్లుగా నటించిన ఈ సినిమాలో కాజల్ అగర్వాల్ ఓ కీలక పాత్రలో కనిపించనుంది.

ఇదిలా ఉంటే.. విడుదల విషయంలో జాప్యం జరుగుతున్నా.. ఈ సినిమా ఫలితం విషయంలో చిత్రయూనిట్ నమ్మకాన్ని వ్యక్తం చేస్తోంది. ఆ నమ్మకానికి గల పలు కారణాల్లో ఒకటిగా.. జయసుధని చెప్పుకొస్తున్నారు. విషయమేమిటంటే.. దిల్ రాజు నిర్మించే సినిమాల్లో సహజ నటి జయసుధ కనిపిస్తే చాలు ఆ సినిమా కచ్చితంగా విజయం నమోదు చేసుకుంటుంది అనే సెంటిమెంట్ ఉంది.

‘బొమ్మరిల్లు’,’ పరుగు’, ‘కొత్త బంగారు లోకం’, ‘సీతమ్మ వాకిట్లో సిరిమల్లె చెట్టు’ సినిమాలు ఈ విషయాన్ని రుజువు చేస్తే.. తాజా సినిమా ‘ఎవడు’ కూడా అదే బాటలో పయనిస్తుందని వారు చెప్పుకొస్తున్నారు. చూద్దాం.. జయసుధ ఫ్యాక్టర్ ఎవడు ఫలితంలో ఎంతమేరకు సెంటిమెంట్ ని పండిస్తుందో!