சமீபத்தில் காலமான புனித் ராஜ்குமார் சமாதியில் தினமும் 30 ஆயிரம் ரசிகர்கள் வந்து அஞ்சலி செலுத்தி வருவதாக தகவல்கள் வெளியாகியுள்ளன.

பிரபல கன்னட நடிகர் புனித் ராஜ்குமார் கடந்த வாரம் திடீரென மாரடைப்பு காரணமாக காலமானார். அவரது மறைவு கன்னட திரையுலகம் மட்டுமின்றி ஒட்டுமொத்த இந்திய திரையுலகிற்கு மிகப்பெரிய இழப்பாக கருதப்பட்டது.

இந்த நிலையில் ஒரு நடிகரின் மறைவு என்றால் ஓரிரு நாட்களில் அந்த நடிகரின் ரசிகர்கள் மறந்துவிட்டு வேலையை பார்க்க ஆரம்பித்து விடுவார்கள். ஆனால் புனித் ராஜ்குமாரை கர்நாடக மாநில மக்கள் நடிகராக மட்டுமின்றி தங்களுடைய வீட்டில் உள்ள உறுப்பினர்களில் ஒருவராக கருதுகின்றனர். அதன் காரணமாக புனித் இழப்பை தாங்க முடியாமல் தினந்தோறும் 30 ஆயிரத்துக்கும் மேற்பட்டோர் அவரது சமாதிக்கு வந்து அஞ்சலி செலுத்தி வருவதாக தகவல்கள் வெளியாகியுள்ளது.

கர்நாடக மாநில காவல்துறை மற்றும் மத்திய காவல் துறையினர் தினமும் 24 மணி நேரமும் புனித் ராஜ்குமார் சமாதிக்கு பாதுகாப்பு ஏற்பாடுகளை செய்துள்ளனர் என்பதும் கட்டுக்கடங்காமல் வரும் ரசிகர்களின் கூட்டத்தை அவர்கள் கட்டுப் படுத்தி வருகின்றனர் என்பதும் குறிப்பிடத்தக்கது.

நடிகராக மட்டுமின்றி கர்நாடக மாநில மக்களின் நல்வாழ்விற்காக அவர் பல்வேறு சமூக சேவைகளை அவர் செய்ததால்தான் அவர் மறைந்து பத்து தினங்கள் ஆகியும் அவருக்கு அஞ்சலி செலுத்த கூட்டம் குவிந்து கொண்டிருக்கிறது என்பது குறிப்பிடத்தக்கது.