இந்தியாவில் இதுவரை 28 பேர் கொரோனாவால் பாதிக்கப்பட்டிருப்பது உறுதி செய்யப்பட்டிருப்பதாக மத்திய சுகாதாரத்துறை அமைச்சர் ஹர்டஷ் வர்தன் தெரிவித்துள்ளார். நேற்று தான் 6 பேருக்கு கொரோனா பாதிப்பு என்று கூறியிருந்தனர். இன்று அந்த எண்ணிக்கை கூடியுள்ளது.

இதில் கேரளாவில் குணமாகி வீடு திரும்பிய 3 பேரும் அடங்குவர். மற்றவர் எல்லோரும் இந்த வாரம் மட்டும் பாதிக்கப்பட்டோர். ஐரோப்பாவில் இருந்து டெல்லி திரும்பிய 45 வயதுடையவர், துபாயில் இருந்து பெங்களூரு திரும்பிய ஹைதரபாத்தைச் சேர்ந்த 24 வயது இளைஞர், ஆக்ராவைச் சேர்ந்த 6 பேர், ராஜஸ்தானுக்கு சுற்றுலா வந்த இத்தாலி நாட்டை சேர்ந்த 16 சுற்றுலாபயணிகள் மற்றும் இத்தாலி சுற்றுலா பயணிகளுக்கு கார் ஓட்டிய டிரைவர் ஆகியோர் கொரானோ வைரஸால் பாதிக்கப்பட்டுள்ளதாக தகவல் வெளியாகி உள்ளது.

கொரோனா வைரஸை எதிர்க்கும் எதிர்ப்பு மருந்துகள் எதுவும் இன்னும் கண்டுபிடிக்கப்படவில்லை என்பதால் நிமோனியாமற்றும் பல நோய்களுக்கு உரிய மருந்துகள் கொடுக்கப்படுகின்றன. சில நாடுகளில் HIV-ன் மருந்துகள் கொடுத்தும் குணமாக்கி உள்ளனர். இது உலக சுகாதாரத்திற்கே ஒரு எச்சரிக்கை என்பதால் மக்கள் கவனமாக இருக்குமாறு கேட்டுக்கொள்ளப்பட்டுள்ளது.

இருமல், தும்மல் மூலமாக இந்த வைரஸானது மிக வேகமாக பரவுகிறது. எனவே தும்மும் போதும் இருமலின் போதும் டிஸ்யூ உபயோகியுங்கள். இல்லையென்றால் உங்கள் முழங்கையையாவது பயன்படுத்துங்கள். இப்போதைக்கு வைரஸ் பரவாமல் தடுப்பது தான் முக்கியம். மேலும் வாட்சப் மற்றும் சமூக வலைத்தளங்ககளில் தவறாக பரப்பப்படும் மருத்துவ முறைகளையும் உறுதிப்படுத்தப்படாத தகவல்களையும் தவிர்க்குமாறு மக்கள் கேட்டுக்கொள்ளப்படுகிறார்கள்.

இருமல், தொண்டைவலி, காய்ச்சல் மற்றும் மூச்சுத்திணறல் இருந்தால் உடனடியாக மருத்துவரை அணுகுங்கள். வீட்டிலேயே இருக்க வேண்டாம். இந்த வைரஸை கட்டுப்படுத்த அரசு தன்னால் முடிந்த அளவிற்கு செயல்பட்டு வருகிறது. மக்களாகிய நாமும் கொஞ்சம் முன்னெச்சரிக்கையாக இருப்பது நல்லது.