కలకలం.. ప్రముఖ టీవీ ఛానెల్‌లో 26 మందికి కరోనా
- IndiaGlitz, [Tuesday,April 21 2020]
కరోనా నేపథ్యంలో విధులు నిర్వహిస్తున్న మీడియా మిత్రులను కూడా కరోనా కాటేస్తోంది. ఇప్పటికే ముంబైలోని 56 మంది జర్నలిస్టులకు కరోనా సోకినట్లు తెలియడంతో ఫోర్త్ ఎస్టేట్‌లో ఒక్కసారిగా కలవరం మొదలైంది. అయితే ఈ ఘటన మరువక మునుపే.. చెన్నైలోని ప్రముఖ చానెల్ ‘సత్యం టీవి’ సిబ్బందిలో 26 మందికి కరోనా పాజిటివ్ రావడం కలకలం రేపుతోంది. వీరికీ ఫీల్డ్‌లో, ఆస్పత్రులు, మార్కెట్స్‌లో న్యూస్ కవరేజ్‌కు వెళ్లినప్పుడు రిపోర్టర్లకు కరోనా సోకిందని తేలింది. ప్రస్తుతం వీరందర్నీ చెన్నైలోని జీజీహెచ్ క్వారంటైన్‌ సెంటర్లకు తరలించి వైద్యం అందిస్తున్నారు.
ఇదిలా ఉంటే.. ఇవాళ ఆ చానెల్‌లో పనిచేస్తున్న 94 మంది ఉద్యోగులకు పరీక్షలు చేయగా.. వారిలో 26 మంది పాజిటివ్ అని తేలింది. ఇంకా కొన్ని ఫలితాలు రావాల్సి ఉంది. మరోవైపు.. సిబ్బందితో పాటు కుటుంబ సభ్యులతో సహా వారు కాంటాక్ట్ అయిన వారిని కూడా క్వారంటైన్‌కు తరలించారు. ఈ క్రమంలో రాయపురంలోని ఛానెల్ కార్యాలయాన్ని సీజ్ చేస్తున్నట్లు అధికారులు ప్రకటించారు.