வேலூர் மாவட்டத்தை சேர்ந்த இளம்பெண் ஒருவர் ஏற்கனவே 2 திருமணம் செய்த நிலையில் மூன்றாவது திருமணம் செய்வதற்காக தனது இரண்டு வயது குழந்தையை கொலை செய்த சம்பவம் பெரும் பரபரப்பை ஏற்படுத்தி உள்ளது.

வேலூர் மாவட்டத்தைச் சேர்ந்த கம்மவான்பேட்டை என்ற பகுதியை சேர்ந்த மஞ்சுளா என்ற 23 வயது இளம்பெண்ணுக்கு ஏற்கனவே இரண்டு முறை திருமணம் நடந்துவிட்டது. முதலில் தனது தாய்மாமனை திருமணம் செய்த மஞ்சுளா அதன் பின்னர் அவருடன் ஏற்பட்ட கருத்து வேறுபாடு காரணமாக பிரிந்து, பின்னர் மதுரையைச் சேர்ந்த பாண்டியன் என்பவரை இரண்டாவதாக திருமணம் செய்து கொண்டார். இந்த தம்பதிக்கு ஒரு பெண் குழந்தை பிறந்தது. இருப்பினும் பாண்டியனுடன்ம் கருத்து வேறுபாடு ஏற்பட்டதால் மஞ்சுளா குழந்தையுடன் தனது அம்மா வீட்டில் தங்கியிருந்தார்.

இந்த நிலையில ராஜாமணி என்பவருடன் மஞ்சுளாவுக்கு மீண்டும் காதல் ஏற்பட்டது. இருவரும் திருமணம் செய்துகொள்ள முடிவு செய்தனர். ஆனால் இந்தத் திருமணத்திற்கு இரண்டு வயது குழந்தை தடையாக இருந்ததால் அந்த குழந்தையை கொலை செய்ய இருவரும் முடிவு செய்தனர். இதனையடுத்து அருகில் உள்ள பாறையில் இருந்து குழந்தையை தூக்கி எறிந்து கொலை செய்துவிட்டு அடுத்த நாளே இருவரும் திருமணம் செய்து கொண்டனர்.

இரண்டு நாட்கள் கழித்து குழந்தையின் பிணத்தை அந்த பகுதியினர் பார்த்து அதிர்ச்சி அடைந்து போலீசில் தகவல் கொடுத்தனர். போலீசார் இதுகுறித்து விசாரணை செய்த போது குழந்தையின் தாயார் மஞ்சுளா தான் என்பதும், அவர் தான் மூன்றாவது திருமணம் செய்து கொள்வதற்காக பெற்ற குழந்தையை கொலை செய்தார் என்பதும் தெரியவந்தது. இதனையடுத்து ராஜாமணி, மஞ்சுளா ஆகிய இருவரையும் கைது செய்த போலீசார் சிறையில் அடைத்துள்ளனர்.

மூன்றாவது திருமணம் செய்வதற்காக இரண்டு வயது பச்சிளம் குழந்தையை கொலை செய்த இளம்பெண்ணால் அந்த பகுதியில் பெரும் பரபரப்பு ஏற்பட்டுள்ளது.