కోవిడ్-19 విజృంభణతోపాటు ప్రాణవాయువు కొరత వేధిస్తున్న సమయంలో ఆక్సిజన్ లీక్ అయింది. ఆక్సిజన్ ట్యాంకర్ లీక్ అవడంతో రోగులకు ప్రాణవాయువు అందించడంలో అంతరాయం ఏర్పడింది. దీంతో 22 మంది కోవిడ్ రోగులు ప్రాణాలు కోల్పోయారు. ఈ సంఘటన మహారాష్ట్రలోని నాసిక్‌లో ఉన్న డాక్టర్ జకీర్ హుస్సేన్ ఆసుపత్రిలో బుధవారం జరిగింది. ఈ ఆసుపత్రిలో దాదాపు 150 మంది రోగులు వెంటిలేటర్, ఆక్సిజన్ సరఫరాపై ఆధారపడి ఉన్నారు.బుధవారం మధ్యాహ్నం ఆక్సిజన్ ట్యాంకర్‌లో ఆక్సిజన్‌ను వేరొక ఆక్సిజన్ ట్యాంకర్ ద్వారా నింపుతున్న సమయంలో ప్రాణవాయువు బయటకు పెల్లుబికింది.

ఈ క్రమం్లోనే దాదాపు అరగంట పాటు ఆసుపత్రిలోని రోగులకు ఆక్సిజన్ సరఫరాలో అంతరాయం ఏర్పడింది. దీంతో వెంటిలేటర్‌పై చికిత్స పొందుతున్న 22 మంది రోగులు ప్రాణాలు కోల్పోయినట్టు ఆరోగ్యమంత్రి రాజేష్ తోపే వెల్లడించారు. ఈ ఘటనపై దర్యాప్తునకు ఆదేశించినట్టు తెలిపారు. ట్యాంకర్ లీకవడంతో గ్యాస్ ఒక్కసారిగా బయటకు వచ్చి కమ్మేసింది. దీంతో అగ్నిమాపక సిబ్బంది సంఘటనా స్థలానికి చేరుకుని ఆక్సిజన్ లీక్‌ను వెంటనే నియంత్రించారు. అయితే ఈ క్రమంలోనే ఆక్సిజన్ అవసరమైన రోగుల్లో దాదాపు 30 మందిని వేరే హాస్పిటళ్లకు తరలించారు. ఇప్పటికే మహారాష్ట్రలో కరోనా విజృంభిస్తోంది. మరోవైపు ఆక్సిజన్ కొరత వేధిస్తోంది. ఈ సమయంలో ఇలాంటి ఘటన జరగడం ఆందోళన కలిగిస్తోంది.

ఘటనపై మహారాష్ట్ర మంత్రి డాక్టర్ రాజేంద్ర షింగనే స్పందించారు. ఇది చాలా దురదృష్టకరమైన సంఘటన అని డాక్టర్ షింగనే తెలిపారు. దీనిపై సవివరమైన నివేదికను తెప్పించుకునేందుకు ప్రయత్నిస్తున్నామన్నారు. ఈ సంఘటనపై దర్యాప్తునకు ఆదేశించినట్లు పేర్కొన్నారు. ఈ దారుణానికి బాధ్యులైనవారిని వదిలిపెట్టేది లేదన్నారు. ఘటనపై మాజీ ముఖ్యమంత్రి దేవేంద్ర ఫడ్నవీస్ స్పందించారు. ఇదొక భయానక ఘటన అని.. ఆసుపత్రిలో చికిత్స పొందుతున్న ఇతర రోగులను సైతం వేరే ఆసుపత్రులకు తరలించాలని పేర్కొన్నారు. ఘటనపై తక్షణమే విచారణ చేపట్టాలని డిమాండ్ చేశారు.