3வது நாளாக தொடரும் 2000ஐ தாண்டிய பாதிப்பு: தமிழக கொரோனா நிலவரம்
- IndiaGlitz, [Friday,June 19 2020]
கடந்த சில வாரங்களுக்கு முன்வரை தமிழகத்தில் நூற்றுக்கணக்கில் மட்டுமே கொரோனா பாதிப்பு இருந்த நிலையில் சமீபத்தில் அது ஆயிரத்தை தொட்டது. தற்போது கடந்த இரண்டு நாட்களாக இரண்டாயிரத்தை தாண்டி வரும் நிலையில் இன்றும் மூன்றாவது நாளாக 2000ஐ தாண்டிய கொரோனா பாதிப்பால் பெரும் பரபரப்பு ஏற்பட்டுள்ளது
தமிழக சுகாதாரத்துறையின் தகவலின்படி தமிழகத்தில் இன்று 2115 பேருக்கு கொரோனா வைரஸ் தொற்று பரவியுள்ளது என்றும், இதனால் தமிழகத்தில் கொரோனா தொற்றால் பாதிக்கப்பட்டவர்களின் எண்ணிக்கை 54,449 ஆக அதிகரித்துள்ளது. மேலும் சென்னையில் இன்று கொரோனா தொற்றால் 1322 பேர் பாதிக்கப்பட்டுள்ளனர் என்றும், சென்னையில் கொரோனாவால் பாதிக்கப்பட்டவர்களின் எண்ணிக்கை 38,327 ஆக உயர்வு என்றும் சுகாதாரத்துறை அறிவித்துள்ளது.
மேலும் தமிழகத்தில் இன்று கொரோனாவால் 41 பேர் மரணம் அடைந்துள்ளதால் தமிழகத்தில் கொரோனா மரணங்கள் எண்ணிக்கை 666 ஆக அதிகரித்துள்ளது என்பது அதிர்ச்சிக்குரிய செய்தி ஆகும்.
மேலும் தமிழகத்தில் இன்று ஒரே நாளில் கொரோனா பாதித்த 1,630 பேர் குணமடைந்துள்ளனர் என்பது தான் ஒரே ஆறுதல் என்பதும், இதனையடுத்து 30,271 பேர் மொத்தம் தமிழகத்தில் கொரோனாவில் இருந்து குணமாகியுள்ளனர் என்பதும் குறிப்பிடத்தக்கது.