சென்னையில் நாளுக்கு நாள் கொரோனா வைரஸ் தாக்கம் அதிகரித்து கொண்டே இருப்பதால் தமிழகத்தின் மற்ற பகுதிகளில் ஊரடங்கு தளர்த்தப்பட்டாலும், சென்னையில் ஊரடங்கு இன்னும் சில மாதங்களுக்கு தொடரும் என்றே எதிர்பார்க்கப்படுகிறது. சென்னையின் மக்கள் தொகை அதிகம் என்ற ஒரு காரணம் இருந்தாலும் சென்னை மக்கள் சமூக இடைவெளியை கடைபிடிப்பதில்லை என்ற குற்றச்சாட்டும் உள்ளது.

இந்த நிலையில் சென்னை ஐஸ்ஹவுஸ் பகுதியின் ஒரே தெருவில் 19 பேருக்கு கொரோனா வைரஸ் உறுதி செய்யப்பட்டுள்ளதாக வெளிவந்திருக்கும் தகவல் பெரும் அதிர்ச்சியை ஏற்படுத்தியுள்ளது. சென்னை ஐஸ்ஹவுஸ் பகுதியில் ஏற்கனவே 16 பேருக்கு கொரோனா வைரஸ் உறுதி செய்யப்பட்டிருந்த நிலையில் தற்போது ஐஸ்ஹவுஸ் வி.ஆர்.பிள்ளை தெருவில் மேலும் 19 பேருக்கு கொரோனா வைரஸ் உறுதியாகியுள்ளது. இதனால் அந்த பகுதியில் இருக்கும் பொதுமக்கள் கடும் அச்சம் அடைந்துள்ளனர்.

ஐஸ்ஹவுஸ் பகுதியில் கொரோனா வைரஸ் பாதித்த ஒரு நபரின் வீட்டில் குடியிருந்த 11 பேருக்கு கொரோனா உறுதியாகியுள்ளது என்பது குறிப்பிடத்தக்கது. ஏற்கனவே ஐஸ்ஹவுஸ் பகுதியில் தன்னார்வலர் ஒருவருக்கு கொரோனா உறுதி செய்யப்பட்டதால் அவரிடம் உதவி பெற்ற அனைவரும் வீட்டில் தனிமைப்படுத்தப்பட்டுள்ளனர் என்பது குறிப்பிடத்தக்கது.