திண்டுக்கல் அருகே 7ஆம் வகுப்பு படித்து வரும் 13 வயது சிறுமியை பாலியல் வல்லுறவு செய்த 12ஆம் வகுப்பு மாணவன் ஒருவன், அந்த சிறுமியை மின்சாரம் பாய்ச்சி கொலை செய்துள்ள அதிர்ச்சி தகவல் வெளிவந்துள்ளது.

திண்டுக்கல் அருகே மோர்பட்டி என்ற கிராமத்தை சேர்ந்த 13 வயது சிறுமி, பெற்றோர்கள் வேலைக்கு சென்றதால் தனியாக இருந்துள்ளார். வேலைக்கு சென்ற பெற்றோர்கள் திரும்பி வந்து பார்த்தபோது சிறுமியின் கையில் மின்சார வயர் இருந்ததும், அவர் மின்சாரம் தாக்கி உயிரிழந்ததையும் கண்டு அதிர்ச்சி அடைந்தனர். மேலும் சிறுமியின் உடலில் காயங்கள் இருந்ததால் சந்தேகம் அடைந்த பெற்றோர்கள் இதுகுறித்து காவல்துறைக்கு தகவல் அளித்தனர்.

இந்த நிலையில் இதுகுறித்து வழக்குப்பதிவு செய்த போலீசார் தீவிர விசாரணையில் ஈடுபட்டபோது அதே பகுதியை சேர்ந்த 12ஆம் வகுப்பு மாணவன், அந்த சிறுமியை பாலியல் வல்லுறவு செய்து மின்சாரம் பாய்ச்சி கொலை செய்தது கண்டுபிடிக்கப்பட்டது. இதனையடுத்து அந்த சிறுவனை போக்சோ சட்டத்தில் போலீசார் கைது செய்தனர்.