சென்னை அண்ணா சாலையில் உள்ள ஒரு கல்லூரியில் விடுதியில் தங்கியிருந்த 105 மாணவிகளுக்கு திடீரென வாந்தி மயக்கம் ஏற்பட்டதால் அவர்கள் மருத்துவமனையில் அனுமதிக்கப்பட்டுள்ளனர்.

சென்னை அண்ணா சாலையில் உள்ள கல்லூரி ஒன்றின் விடுதியில் தங்கியிருக்கும் மாணவிகளுக்கு நேற்று இரவு பல்லி விழுந்த உணவு பரிமாறப்பட்டதாக தெரிகிறது. இதனால் உணவை சாப்பிட்ட சிறிது நேரத்தில் வாந்தி மற்றும் மயக்கம் ஏற்பட்ட 105 மாணவிகள் உடனடியாக சென்னை ராஜீவ் காந்தி அரசு மருத்துவமனை மற்றும் ராயப்பேட்டை அரசு மருத்துவமனையில் அனுமதிக்கப்பட்டனர்.

பெரும்பாலான மாணவியர்கள் புற நோயாளிகள் பிரிவிலேயே சிகிச்சை அளிக்கப்பட்ட நிலையில் தற்போது சென்னை ராஜீவ் காந்தி மருத்துவமனையில் 17 மாணவியர்களும், ராயப்பேட்டை மருத்துவமனையில் 48 மாணவியர்களும் உள்நோயாளியாக சிகிச்சை பெற்று வருகின்றனர்.

இந்த சம்பவம் குறித்து உணவு பாதுகாப்பு துறை அதிகாரிகள் ஆய்வு செய்து வருகின்றனர். மேலும் கல்லூரியின் விடுதி மாணவிகளுக்கு மட்டும் ஒரு வார காலம் விடுமுறை அளிக்கப்பட்டுள்ளது.