பழம்பெரும் இயக்குனர் மகேந்திரன் உடல்நலக்குறைவு காரணமாக கடந்த சில தினங்களாக சென்னையில் உள்ள தனியார் மருத்துவமனை ஒன்றில் சிகிச்சை பெற்று வந்த நிலையில் இன்று காலை அவர் காலமானார். அவருடைய மறைவு தமிழ்த்திரையுலகினரை அதிர்ச்சி அடைய செய்துள்ளது. பிரபல திரை நட்சத்திரங்கள் அவருடைய மறைவிற்கு இரங்கல் தெரிவித்து வருகின்றனர்.

இயக்குனர் ஏ.ஆர்.முருகதாஸ்: காலத்தால் அழியாத சினிமாக்களை உருவாக்கிய மகேந்திரன் மறைவு செய்தியை கேட்டு மிகுந்த வருத்தம் அடைந்தேன். நீங்களும் உங்கள் படங்களும் எங்கள் நெஞ்சங்களில் என்றுமே வாழ்ந்து கொண்டிருக்கும். அதற்கு அழிவே இல்லை.

இயக்குனர் அஹ்மது: மகேந்திரன் அவர்களது மரணம் மிகப்பெரிய துயரம். அவருடைய ஆன்மா சாந்தியடையட்டும்

ஒளிப்பதிவாளர் பிசி ஸ்ரீராம்: மகேந்திரன் குறைவாகத்தான் பேசுவார். ஆனால் அவருடைய படம் நிறைய பேசும். அவருடைய படங்கள் எனக்கு மிகப்பெரிய இன்ஸ்ப்ரேஷன். உதிரிப்பூக்கள் படம் பார்த்து பல நாட்கள் நான் தூங்காமல் இருந்துள்ளேன். அவருடைய ஆன்மா சாந்தியடைய பிரார்த்தனை செய்கிறேன்

இயக்குனர் வெற்றிமாறன்: காலம் கடந்தும் ரசிகர்களின் இதயத்தில் நீங்கா இடம் பிடித்தவர் மகேந்திரன். பல இயக்குனர்களுக்கு முன்மாதிரியாக இருந்தவர். செய்யும் தொழிலில், எந்த ஒரு சமரசமும் செய்துகொள்ளாமல் பணியாற்றியவர். 

இயக்குனர் ரஞ்சித்: இயக்குனர் மகேந்திரன் எளிமை தான் உங்கள் இலக்கு. திரைவிமர்சனம் எழுதியது மட்டும் இல்லாமல் எது கலைத்தன்மையோடு வெகு சன மக்களை கவர்ந்திழுக்கும் சினிமா என்று “உதிரி பூக்கள்” முள்ளும் மலரும்” போன்ற படங்களை எடுத்து காட்டிய அதிசயம் நீங்கள். ஐயா உம் படைப்புகள் எப்போதும் வாழும்.