தமிழ் திரைப்பட தயாரிப்பாளர் சங்கத்தின் சார்பில் வரும் பிப்ரவரி 2 மற்றும் 3 ஆகிய தேதிகளில் சென்னை நந்தனத்தில் உள்ள ஒய்.எம்.சி.ஏ மைதானத்தில் 'இளையராஜா 75' என்ற பிரமாண்டமான இசை நிகழ்ச்சி நடைபெறவுள்ளது.

இந்த நிகழ்ச்சியை ஒத்தி வைக்க முடியுமா? என்று சென்னை உயர்நீதிமன்றம் தயாரிப்பாளர் சங்கத்தை கேட்டுக்கொண்டிருந்தாலும் இந்த நிகழ்ச்சியின் ஏற்பாடுகள் விறுவிறுப்பாக நடைபெற்று வருகிறது. இந்த நிகழ்ச்சியை தமிழக கவர்னர் பன்வாரிலால் புரோஹித் தொடங்கி வைப்பார் என்றும், மத்திய அமைச்சர் பொன் ராதாகிருஷ்ணன் இந்த நிகழ்ச்சியில் கலந்து கொள்வார் என்றும் எதிர்பார்க்கப்படுகிறது. அதேபோல் கமல்ஹாசன், ரஜினிகாந்த் உள்பட பல திரையுலக பிரமுகர்களும் இந்த நிகழ்ச்சியில் கலந்து கொள்ளவுள்ளனர்.

இந்த நிலையில் இந்த நிகழ்ச்சியின் இரண்டாம் நாளாக பிப்ரவரி 3ஆம் தேதி இளையராஜா இசைக்கச்சேரியை நடத்தவுள்ளார். அதில் சிம்போனி இசையும் இடம்பெறவுள்ளது. இதற்காக ஹங்கேரியில் இருந்து சிம்போனி இசைக்கலைஞர்கள் வரவழைக்கப்பட்டுள்ளனர். இன்று காலை ஹங்கேரியில் இருந்து சென்னை வந்த சிம்போனி இசைக்கலைஞர்கள் மரியாதை நிமித்தமாக இளையராஜாவை சந்தித்தனர்.